பட்டாணி, மார்ச்.14-
தென் தாய்லாந்தின் பட்டாணி, மாலான் மாவட்டத்தில் இன்று அதிகாலை நிகழ்ந்த இரு வெவ்வேறு குண்டு வெடிப்புச் சம்பவங்களில் ஒன்பது போலீசார் காயமடைந்தனர். அவர்கள் பாதுகாப்புப் பணியில் ஈடுபட்டிருந்த போது உள்ளூர் நேரப்படி காலை 8.50 மணியளவில் முதல் சம்பவம் நிகழ்ந்ததாக மாலான் மாவட்ட காவல் துறைத் தலைவர் தெரிவித்தார்.
சம்பவத்தின் போது, போலீஸ் குழு மூன்று மோட்டார் சைக்கிள்கள் மற்றும் நான்கு சக்கர டிரைவ் வாகனங்களில் ரோந்து சென்று கொண்டிருந்தது. திடீரென்று, ஒரு வெடிப்பு ஏற்பட்டது. அதில் பணியில் இருந்த ஒன்பது பேர் காயமடைந்தனர் என்று அவர் கூறினார்.
சுமார் 20 நிமிடங்களுக்குப் பிறகு, அருகிலுள்ள சாலையின் ஓரத்தில் மற்றொரு வெடிகுண்டு வெடித்தது என்று அவர் கூறினார். முதற்கட்ட விசாரணையில், இரண்டு வெடிகுண்டுகளும் சாலையோரத்தில் உள்ள மின்கம்பத்தில் பொருத்தப்பட்டிருந்தது கண்டுபிடிக்கப்பட்டது.
காயமடைந்த அனைத்து காவல்துறையினரும் சிகிச்சைக்காக மாலான் மருத்துவமனைக்கு அனுப்பப்பட்டுள்ளதாகவும், அவர்களின் உடல்நிலை தற்போது சீராக இருப்பதாகவும் தெரிவிக்கப்பட்டுள்ளது.
அவ்வெடிப்புக்குக் காரணமாக இருந்தவர்களைப் பிடிக்க போலீசார் தீவிரமாக விசாரணை நடத்தி வருகின்றனர். மார்ச் 8 ஆம் தேதி நாராதிவாட் மற்றும் பட்டாணி மாவட்டங்களில் குண்டுவெடிப்புகள் மற்றும் துப்பாக்கிச் சூடு சம்பவங்களில் ஐந்து பேர் கொல்லப்பட்டனர் மற்றும் 13 பேர் காயமடைந்தது குறிப்பிடத்தக்கது.
