டக்கா, நவம்பர்.29-
வங்காளதேசத்தின் முன்னாள் பிரதமரும், வங்காளதேச தேசியவாத கட்சியின் தலைவருமான கலிதா ஜியா, 80, இதயம் மற்றும் நுரையீரல் தொற்று நோய் காரணமாக, டாக்காவில் உள்ள எவர்கேர் மருத்துவமனையில் அனுமதிக்கப்பட்டு உள்ளார். சிறப்பு டாக்டர்கள் குழு அவருக்கு தீவிர சிகிச்சை அளிக்கிறது.
அவரது உடல்நிலை மிகவும் மோசமாக இருப்பதாக டாக்டர்கள் தெரிவித்துள்ளனர். ஏற்கனவே நீரழிவு, கல்லீரல், சிறுநீரக பிரச்னைகள், இதய கோளாறு போன்ற உடல்நலப் பிரச்னைகளால் அவர் அவதிப்பட்டு வந்ததாகக் கூறப்படுகிறது.
கடந்தாண்டு வங்காளதேசத்தில் மாணவர் போராட்டம் ஏற்பட்டு ஷேக் ஹசீனா ஆட்சி கவிழ்ந்த பின், அடுத்தாண்டு நாடாளுமன்றத் தேர்தல் நடக்க உள்ள நிலையில், கலிதா ஜியாவின் உடல்நலப் பாதிப்பு அக்கட்சிக்கு பின்னடைவாகப் பார்க்கப்படுகிறது. கடந்த 1991 - 96 மற்றும் 2001 - 06 என இரு முறை வங்காளதேசப் பிரதமராக இருந்த கலிதா ஜியா, ஊழல் வழக்குகளில் சிக்கி, 17 ஆண்டுகள் சிறைத் தண்டனைப் பெற்றவர். கடந்தாண்டு ஆகஸ்டில் சிறையில் இருந்து அவர் விடுவிக்கப்பட்டார்.
