தமிழக வெற்றிக் கழகத் தலைவர் விஜய்யை நேரில் காண்பதற்காகச் சென்றபோது, பிரசார வாகனத்தில் சிக்கிப் படுகாயமடைந்த இளைஞர் ஒருவர், தனது சிகிச்சைக்கு விஜய் உதவ வேண்டும் என வீடியோ மூலம் உருக்கமான கோரிக்கை விடுத்துள்ளார்.
திருவள்ளூர் மாவட்டத்தில் நேற்று நடைபெற்ற தேர்தல் பிரசாரத்தின்போது விஜய்யைக் காண்பதற்காக ஏராளமான ரசிகர்கள் திரண்டனர். அப்போது ஏற்பட்ட கூட்ட நெரிசலில் சிக்கிய அந்த இளைஞர், விஜய்யின் பிரசார வாகனத்திற்கு அடியில் சிக்கியதில் அவரது காலில் பலத்த எலும்பு முறிவு ஏற்பட்டது. தற்போது மருத்துவமனையில் அனுமதிக்கப்பட்டுச் சிகிச்சை பெற்று வரும் அந்த இளைஞர், தனது குடும்பச் சூழ்நிலை காரணமாகச் சிகிச்சைக் கட்டணத்தைச் செலுத்த இயலாத நிலையில் இருப்பதாகத் தெரிவித்துள்ளார்.
தான் விஜய்யின் தீவிர ரசிகர் என்றும், அவரைப் பார்க்க ஆவலுடன் சென்றபோது இந்த விபத்து நேரிட்டதாகவும் குறிப்பிட்ட அவர், தனது நிலையை உணர்ந்து விஜய் சிகிச்சைக்குத் தேவையான நிதி உதவி வழங்க வேண்டும் என அந்த வீடியோவில் கேட்டுக்கொண்டுள்ளார். இந்த வீடியோ தற்போது சமூக வலைதளங்களில் வேகமாகப் பரவி, கட்சி நிர்வாகிகளின் கவனத்திற்குச் சென்றுள்ளது.
