மணிலா, ஏப்ரல்.08-
மத்திய பிலிப்பைன்ஸில் இன்று காலை எரிமலையொன்று குமுறி வெடித்து, சாம்பல் மற்றும் குப்பைகளை வெளியேற்றியது. அதனால் அருகிலுள்ள பள்ளிகளை மூடி குடியிருப்பாளர்களை வெளியேற்ற வேண்டிய கட்டாயம் ஏற்பட்டதாகத் அதிகாரிகள் தெரிவித்ததாக ஜெர்மன் செய்தி நிறுவனம் (dpa) தெரிவித்துள்ளது.
கன்லாவோன் எரிமலையின் உச்சிப் பள்ளத்தில் வெடிப்பு நிகழ்ந்ததாக பிலிப்பைன்ஸ் எரிமலையியல் மற்றும் நில அதிர்வு நிறுவனம் தெரிவித்துள்ளது. இந்த வெடிப்பு 4,000 மீட்டர் உயரத்திற்கு அடர்த்தியான புகை மண்டலத்தை உருவாக்கியது. அது தென்மேற்கு நோக்கி நகர்ந்தது" என்று அந்த நிறுவனம் ஓர் அறிக்கையில் தெரிவித்துள்ளது..
அருகிலுள்ள நகரங்கள் மற்றும் சிறு நகரங்களில் சாம்பல் சூழ்ந்ததாக அறிவிக்கப்பட்டது. இதனால் பள்ளிகள் மூடப்பட்டன. மேலும் விமான அதிகாரிகள் விமானிகளை அந்தப் பகுதியைத் தவிர்க்குமாறு எச்சரித்தனர்.
டிசம்பர் 2024 இல், கன்லாவோன் எரிமலை வெடிப்பு 8,000 குடியிருப்பாளர்களைத் தங்கள் வீடுகளை விட்டு வெளியேறக் கட்டாயப்படுத்தியது.
எரிமலையின் எச்சரிக்கை நிலை தற்போது 3 ஆம் மட்டத்தில் உள்ளது. இருப்பினும், எச்சரிக்கை அளவை உயர்த்த வேண்டிய அவசியமில்லை என்று தெரிவிக்கப்பட்டுள்ளது.
2,435 மீட்டர் உயரமுள்ள எரிமலையான கன்லாவோன், பிலிப்பைன்ஸில் மிகவும் சுறுசுறுப்பான எரிமலைகளில் ஒன்றாகும். 1996 ஆம் ஆண்டு, எச்சரிக்கை இல்லாமல் எரிமலை வெடித்ததில், அதன் அருகில் இருந்த மூன்று மலையேறிகள் உயிரிழந்தனர்.
