ஐரோப்பாவில் வீசி வரும் கடுமையான வெப்ப அலைக்கு இடையே, நிறுத்தப்பட்டிருந்த காரில் இருந்து மூன்று வயது சிறுவன் ஒருவன் உயிரிழந்த நிலையில் சடலமாகக் கண்டெடுக்கப்பட்டுள்ளான். இந்த வாரத்தில் கடும் வெப்பம் காரணமாக பிரான்சில் காரில் சிக்கி குழந்தை உயிரிழக்கும் மூன்றாவது சம்பவம் இதுவாகும்.
பாரிஸ் நகரின் புறநகர்ப் பகுதியான செயின்ட் கிரேடியன் என்ற இடத்தில், பெற்றோர் தங்களது வீட்டின் வெளியே நிறுத்தப்பட்டிருந்த காரில் இந்தச் சிறுவனை இறந்து கிடந்த நிலையில் கண்டெடுத்துள்ளனர். பிரான்சில் 1947-ஆம் ஆண்டிற்குப் பிறகு மிகக் கடுமையான வெப்ப நாளாகப் பதிவாகியுள்ள இந்தச் சூழலில், பாரிஸ் நகரில் வெப்பநிலை 40.3 டிகிரி செல்சியஸைக் கடந்துள்ளது.
இதற்கு முன்னதாக, கடந்த திங்கட்கிழமையன்று தெற்கு பிரான்சின் கார்பென்ட்ராஸ் நகரில் இதேபோன்று நிறுத்தப்பட்டிருந்த காரில் சிக்கி இரண்டு மற்றும் நான்கு வயதுடைய இரு சிறுவர்கள் உயிரிழந்தனர். தற்போது பாரிஸ் நகரில் மட்டும் கடுமையான வெப்பம் காரணமாக உயிரிழப்புகள் அதிகரித்து வருவதாக அந்நாட்டு அதிகாரிகள் தெரிவித்துள்ளனர்.
